I-Covid-19 ibulala umuntu wesine

26 Apr, 2020 - 00:04 0 Views
I-Covid-19  ibulala umuntu wesine

The Sunday News

YiNtatheli kaMthunywa
SOKUPHINDE kwadlula omunye njalo umuntu emhlabeni kuleli kubangelwa ngumkhuhlane weCovid 19 kwesinye isibhedlela esiseHarare osekusenza kube labantu abane asebebulewe ngumkhuhlane lo.

UMphathintambo obona ngezeMpilakahle kanye lokondliwa kuhle kwabantwana kuleli, uDokotela Obadiah Moyo uveze lokhu kuviki ephelileyo ekhuluma lentatheli eceleni, ngesikhathi esamukela isipho sempahla zokugqoka ezokuvikela lumkhuhlane kanye lomtshina wokuhlola ovela kunhlanganiso yezempilakahle kumhlaba wonke jikelele (World Health Organisation) eHarare.

NgoMvulo mhlaka 21 Mabasa isilinganiso sabantu abalegcikwane le-Covid-19 sikhwele safika ku-28 kweleZimbabwe.

Uthe njengababona ngezempilakahle baqale ukudinga umkhondo wabanye abantu abangabe beke baba lomuyi kusukela izolo ebusuku.

Uthe iziphathamandla ziyadingisisa njalo ukuba zithole umkhondo ngaleligcikwane.

“Silokhu sisadingisisa ngomkhondo waleligcikwane, okwakhathesi esikwaziyo yikuthi umuyi ubevela eMhondoro,” kutsho uMphathintambo uMoyo.

NgoLwesihlanu kuviki ephelileyo, abatholakale belomkhuhlane lo kuleli besebefika amatshumi amabili lasitshiya galombili.

Share This:

Survey


We value your opinion! Take a moment to complete our survey

This will close in 20 seconds